Patu Ne'e Angi (Alan Ma Lingi)

Amaniae ..........
Lampa di tolo ma sadundu tolu
Ancamu siwi di mada doho siwe
Auku edamu dawa,u kaimu wari ade
Warasi ne,e aina ntanda ni,i.

Amancawae..........
Ade weki upa dou, katioku sabua di weha sabae
Makani kabaya kala, mantika ndi kili
Sarome ome, labo woi di’ imi
Sarome maci, ntika di meci

Amaniae..........
Maco ndi hanta, dinca di anca
Ngarimu tolo magaga tala
Hantapu sarau loaku eda sara,a
Aina ncara rumpa, mada doho malampa rimpu

Amancawae..........
Tiwa,u mu ili di sia malampa ulu
Katiosi gegana, wancuku ipi gagana
Konemu rimpu ili karinga weaku eli
Elimu ma alu na midi kone ala

Amaniae..........
Angi ma kasiso, aina ipi ka susu
Tio walipu wunga lampa wela
Aina ipi patu, mai kai ba ncara pata
Kombi laina mode wara kai midi

Amancawae..........
Samada ra eda wara kai midi
Tiloa ndi co,o ndai ma sama ca,u
Kone mu ciri waraku cara
Su,u na fare, wa,u ra bune ana fari

Amaniae.........
Tiwa,u ndi ili sia malampa ulu,
Kabaya kala wa,u ra karu kila,
Ka ngena ku ita ndi malao oto
Loaku nuntu ntiri waraku di nenti

Amancawae..........
Do,o na doro ade pidu dore
Dei na sori kalampa sora
Tewe ku ati, nggomi ndi lao oto
Kone tapa ba rui, di malao londo rai

Amaniae.........
Warasi wi,i aina nefa di wa,a
Ta kacampo tedi waraku nggahi matada,
Tanda ne’e ndai ma kacampo nu’u
warasi umu sa,e tu, upu uma

Amancawae.........
Sampuru dua ri,i wa,u ra wara sara,a
Ade nika ra neku, wa,u ra wara ma niki
Tiru wara ndi uri, wa,u ra mpoi ndi uru
Mbotora dou ma ngena ndai ma doho dua

Source Patu Alan Malingi